काठमाडौ । शुक्रवारबाट प्रदर्शनमा आएको फिल्म ‘राज्जा रानी’मा समावेश नायिका रेखा थापा फिचरिङ आइटम गीतको भिडियो सार्वजनिक भएको छ ।
फिल्म प्रदर्शन अगाडिसम्म रेखाको भूमिका सस्पेन्स राखेको निर्माण पक्षले शुक्रवार ‘पिंकु मिस’ बोेलको मैथिली भर्सन आइटम गीत सार्वजनिक गरेको हो । भिडियोमा रेखाले आकर्षक नृत्य प्रस्तुत गरेकी छिन् ।
गीतमा यम थापाको शब्द, ताराप्रकाश लिम्बुको संगीत र सहिमा श्रेष्ठको स्वर सुन्न सकिन्छ । धेरैपछि रेखाले फिल्ममा आइटम डान्स गरेकी हुन् । ‘राज्जा रानी’मा उनकोे गेस्ट रोल पनि छ । फिल्ममा उनी पिंकु थापाको भूमिकामा देखिएकी छिन् ।
रेखालाई फिल्मको पहिलो हाफपछि मात्र दर्शकले भेट्न पाउँछन् । दाइजो प्रथाको कथा बोल्ने फिल्म ‘राज्जा रानी’मा नायिका केकी अधिकारी र नायक नाजिर हुसेनको प्रमुख भूमिका छ । आर्यन फिल्म प्रोडक्सनको ब्यानरमा निर्मित तथा यम थापा निर्देशित यो फिल्मलाई रमेश एमके पौडेलले निर्माण गरेका हुन् ।
फिल्ममा केकी र नाजीरका अलावा कामेश्वर चौरासिया, लक्ष्मी बर्देवा, संगीता नापित, अरुण रेग्मी, दीपक क्षेत्री, विनोद निरौला, अनोज पाण्डे, अशोक आचार्य, अनुज थापा लगायतका कलाकारहरुको पनि अभिनय छ ।
