दसौं संस्करणमा नगद पुरस्कारको कुल राशि पाँच लाख ६० हजार ६६६ रुपैयाँ
गणेश वाम्बुले राई
सोक्मटार (ओखलढुंगा)।
व्याकुल माइला गोल्डकप–२०८३ को दसौं संस्करणको खेलकुदको तयारी तीव्रगतिमा अगाडि बढेको छ ।
नयाँ नेपाल सरोकार समाजको आयोजनामा हुने फुटबल प्रतियोगिता आगामी कात्तिक ९ गतेदेखि १७ गतेभित्र सम्पन्न हुनेछ ।
उक्त खेल राष्ट्रगानका सर्जक प्रदीपकुमार राई ‘व्याकुल माइला’ को जन्मथलोम ओखलढुंगाको मानेभन्ज्याङ गाउँपालिका–६ सोक्मटार दुधकोसी किनार ब्आलेमबगर खेलमैदानमा हुँदै आएको छ ।
सर्जक व्याकुल माइला पूर्व कराते खेलाडी हुनुहुन्छ । उहाँको सम्मानमा स्थानीयवासीले २०६८ सालदेखि युवा लक्षित खुला नकआउट फुटबल प्रतियोगिता निरन्तर आयोजना गर्दै आएका छन् ।
‘खेलकुदको माध्यमबाट विकासको अभियान’ नारासहित खेल सुचारु रहेको छ ।
खेलको मुख्य उद्देश्यअन्तर्गत स्थानीय प्रतिभावान फुटबल खेलाडीलाई अवसर प्रदान गर्ने, युवालाई सकारात्मक गतिविधिमा सहभागी गराउने, खेल पर्यटन तथा स्थानीय अर्थतन्त्रलाई टेवा दिने, व्याकुल माइलाको योगदानलाई पुस्तान्तरण गर्ने, सामाजिक, सांस्कृतिक र खेलकुद गतिविधिलाई एकै थलोमा जोड्नेलगायत रहेका छन् ।
आगामी प्रतियोगिताका निम्ति तीव्रगतिमा काम भइरहेको दसौं संस्करण मूल आयोजक समितिका संयोजक मिलनकुमार राईले बताउनु भएको छ ।
‘कोसीमा आएको बाढीले खेलमैदान ध्वस्त भएको थियो । त्यसलाई मर्मत गरेका छौं । अब असोज १५ गतेभित्र खेलमैदानदेखि मन्च सबै बनाइसक्ने छौं,’ संयोजक राईले भन्नुभयो । दसौं संस्करणको खेलकुद आयोजना गर्नका निम्ति मानेभन्ज्याङ गाउँपालिकाले १० लाख रुपैयाँ बजेट छुटाएको छ ।
दसौं संस्करणमा नगद पुरस्कारको कुल राशि पाँच लाख ६० हजार ६६६ रुपैयाँ व्यवस्था गरेको जनाइएको छ ।
जसमा प्रथम स्थान हासिल गर्ने क्लबलाई तीन लाख ३३३ रुपैयाँ राशिको नगद पुरस्कार, शिल्ड, मेडल र प्रमाणपत्र प्राप्त गर्नेछ । यसैगरी दोस्रो स्थान हासिल क्लबले एक लाख ५० हजार १११ रुपैयाँ प्राप्त गर्नेछ । सेमिफाइनलिस्ट क्लबले ४० हजार १११ रुपैयाँ प्राप्त गर्नेछ ।
यसैगरी ‘बेस्ट प्लेयर’, ‘टप स्कोरर’, ‘बेस्ट किपर’ र ‘इमर्जिङ प्लेयर’ले जनही पाँच–पाँच हजार रुपैयाँ नगद पुरस्कार प्राप्त गर्नेछन् । यसैगरी सहभागी क्लबहरूमध्ये एउटाले १० हजार रुपैयाँ राशिसहित ‘दिल–कर्ण बेस्ट टिम अवार्ड’ पाउने छ ।
मूल आयोजक समितिले दिएको जानकारीअनुसार सहभागी हुने क्लबले प्रवेश शुल्क वापत १२ हजार ५०० रुपैयाँ बुझाउनु पर्नेछ । यसैगरी कार्ड डिपोजिट शुल्क पाँच हजार रुपैयाँ लाग्ने जनाइएको छ ।
यसपटक सकेसम्म खेललाई राम्रो बनाउने प्रयास जारी राखेको मूल आयोजक समितिका सदस्य तथा खेलाडी सुजन वाम्बुले राईले बताउनु भयो ।
‘खेलमैदान मर्मत सम्भार गरेसँगै हामीले वेब सर्फर कम्पनीसँग इन्टरनेट पार्टसिपको सम्झौता गरेर जोडेका छौं,’ उहाँले भन्नुभयो, ‘अहिले व्याकुल माइला खेलमैदानमा जुनसुकै बेला इन्टरनेट चल्छ । मुख्य खेलको बेला पनि प्रत्यक्ष प्रसारण गर्ने लक्ष्य राखेका छौं, जसले गर्दा देश–विदेशबाट हाम्रो खेलबारे जानकारी लिन सकुन् ।’
स्थानीय खेलाडीहरू हरेक दिन खेलकुदको अभ्यास गर्दै आएका छन् । खेललाई व्यवस्थित र चुस्त राख्नका निम्ति हरेक दिन छलफल तथा सल्लाह गर्ने गरेका छन् । ‘यसपटक धेरै राम्रा खेलाडीहरू यो मैदानमा खेल प्रदर्शन गर्न आउनु हुने आशा राखेका छौं,’ सुजनले भन्नुभयो ।
व्याकुल माइला गोल्डकपको पहिलो संस्करण–२०६८ मा आयोजक टिम नयाँ नेपाल सरोकार समाजले जित हात पारेको थियो । त्यसैगरी दोस्रो संस्करण–२०६९ सिर्जना युवा समूह कटारी (उदयपुर), तेस्रो संस्करण–२०७० सुनकोसी युवा समूह, घुर्मी (उदयपुर), चौथो संस्करण–२०७१ सुनकोसी युवा समूह, घुर्मी (उदयपुर)ले जितेका थिए ।
यसैगरी पाँचौँ संस्करण–२०७२ हिलेपानी फुटबल क्लब, इमाडोल (ललितपुर), छैटौँ संस्करण–२०७३ नयाँ नेपाल सरोकार समाज, सातौँ संस्करण–२०७४ सुनकोसी युवा समूह, घुर्मी (उदयपुर), आठौँ संस्करण–२०७६ नयाँ नेपाल सरोकार समाज र नवौँ संस्करण–२०८० दूधकौशिका आधारभूत विद्यालय सोक्मटारले पहिलो पुरस्कार, शिल्ड हात पारेका थिए ।
तस्बिर सौजन्यः नयाँ नेपाल सरोकार समाज, व्याकुल माइला गोल्डकप–२०८३ दसौं संस्करण मूल आयोजक समिति
