लिभु संवाददाता
काठमाडौं माघ २६, विश्वको सर्वोच्च शिखर सगरमाथा आरोहणमा डोमा शेर्पा ‘पहिलो शेर्पा महिला पत्रकार’ बन्ने तयारीमा जुट्नु भएको छ । त्यसका निम्ति तयारीको मध्यचरण पूरा गरेको शुक्रबार काठमाडौंस्थित नेपाल पर्यटन बोर्डमा आयोजित पत्रकार सम्मेलनमा जानकारी दिनु भएको हो । ‘पहिलो महिला शेर्पा पत्रकार सगरमाथा आरोहण–२०१८’ नाम दिइएको उक्त आरोहण आगामी चैत तेस्रो साताबाट सुरु हुनेछ ।
‘हिमाली भेगका सुसुप्त आवाजहरुलाई सञ्चार माध्यमबाट प्रवाह गर्न क्रियाशील छु,’ इन्डिजिनियस टेलिभिजन र हिमालयसन्देश अनाईनमा संवद्ध पत्रकार शेर्पाले पत्रकार सम्मेलनमा भन्नुभयो, ‘मेरो पहिलो उद्देश्य महिलाले पनि गर्न सक्छन भनेर महिलाहरुको सशक्तिकरण गर्ने हो । त्यसपछि पर्वतीय पर्यटनबारे पत्रकारिता क्षेत्रको चासो अभिवृद्धि गराउने रहेको छ ।’
त्यसैगरी पर्वतीय पर्यटन क्षेत्रमा क्रिायशील र नवआगन्तुक महिलाहरुलाई हौसला प्रदान गर्ने, हिमाली भेगमा बसोबास गर्ने आवाजविहीनहरुको आवाज सञ्चार माध्यममा पर्यटनबारे राष्ट्रिय तथा अन्तर्राष्ट्रिय स्तरमा प्रचारप्रसार गर्ने उद्देश्य रहेको छ । शिखर आरोहको पहिलो चरणमा सोलुखुम्बुको ६ हजार १ सय ८९ मिटर उचाईको आइसल्याण्ड पिक चुमिसकेको डोमाले विज्ञप्तिमा जनाउनु भएको छ । शेर्पा पत्रकार समूहका निवर्तमान अध्यक्ष, आदिवासी जनजाति युवा महासंघको उपाध्यक्षसमेत हुनुहुन्छ । उमेरले २८ वर्षीया शेर्पा सोलुखुम्बुको दुधकुण्ड नगरपालिका–२ सालाबेसी निवासी हुनुहुन्छ । उहा“ करिब एक दशकदेखि मातृभाषा शेर्पा र नेपाली भाषाको पत्रकारिता गर्दैआउनु भएको छ ।
त्यस अवसरमा नेपाल पत्रकार महासंघका महासचिव रमेश विष्ट र पूर्वअध्यक्ष सुरेश आचार्य, नेपाल आदिवासी जनजाति पत्रकार महासंघका अध्यक्ष डण्ड गुरुङ, नेपाल शेर्पा संघका अध्यक्ष आङदोर्जे लामा शेर्पा, शेर्पा महिला संघकी अध्यक्ष निमी शेर्पालगायतले शुभकामना व्यक्त गर्नु भएको थियो ।
२०७४ माघ २६ गते प्रकाशित
