काठमाडाैं । केही वर्षको विश्रामपछि बलिउडमा फर्किएकी ऐश्वर्या राय कम तर राम्रो फिल्ममा केन्द्रित हुन खोजिरहेकी छिन् ।
विवाह गरेपछि छोरी जन्माएर घरमै बसेकी ऐश्वर्या बलिउडमा फर्किएसँगै ‘फन्ने खाँ’मा सक्रिय भइन् । उनको फिल्म आगामी इदमा रिलिज हुँदै छ, जसको टक्कर सलमानको ‘रेस ३’सँग हुनेछ । यसपछि पनि ऐश्वर्यालाई लगातार फिल्मको प्रस्ताव आइरहेको छ ।
हालै उनलाई नर्गिस अभिनित फिल्म ‘रात और दिन’को रिमेकका लागि प्रस्ताव आएको छ । स्क्रिप्टअनुसार फिल्ममा उनको दोहोरो भूमिका छ । तर, जब पारिश्रमिकको कुरा उठ्यो, तब उनले १० करोड रुपैयाँ माग गरिन् । उनको ‘रेट’ सुनेर सबै चकित परे । यति पारिश्रमिक अहिले बलिउडमा सबैभन्दा चलेका अभिनेत्रीको पनि छैन ।
तर, ऐश्वर्याको मागमा निर्माता प्रेरणा अरोरा सहमत भइन् । दोहोरो भूमिकामा ऐश्वर्याले निकै मिहिनेत गर्नुपर्ने र फिल्म बन्न लामो समय लाग्ने भएकाले १० करोड दिन आफू राजी भएको अरोराले बताएकी छिन् । –नयाँ पत्रिकाबाट
