काठमाडौँ — कवि मिलनकान्छा किरातीको ‘फूलको विज्ञप्ति’ कवितासंग्रह प्रकाशनमा आएको छ । कृतिभित्र ‘बागी बाटोहरू’, ‘खुसी निल्ने समय’, ‘विद्रोही घाम’, ‘देशवीरको देश’, ‘आँधीको आयातन’, ‘ढेडुको रमिता’, ‘ढुंगाको पत्र’, ‘धुपी जीवन’, ‘फूलको विज्ञप्ति’, ‘हिउँफूल’, ‘माटो र मुन्धुम’, ‘सगरमाथा झुण्डिएको रुख’, ‘सेक्सी सरकार’, ‘तिहारका तीन रङ’, ‘घाइते बन्दुक’, ‘शरणार्थी भगवान’, ‘सेतो पृथ्वीको नक्सा’ लगायत ६० शीर्षकका विचारोत्तेजक कविता रहेका छन् ।
पुस्तक इन्डिगो इन्क प्रकाशनले प्रकाशित गरेको हो ।
शासन व्यवस्थाको बिर्को खोल्दा
ह्वास्सै सामन्त गन्हाउँछ
त्यसैले हो कि
इतिहासमा धेरैचोटि
पुर्खाहरु लडेको देखिन्छ
अब, आर्थिक अवस्था फेर्नुछ
अहो, साँच्चै तिम्रै काँधमा त्यो
सबैको आशा अडेको देखिन्छ ।
(तिमी समृद्धिको नमुना बन्नू)
‘मिलनकान्छा बहुआयामिक व्यक्तित्वका धनी प्रतिभा हुन् । वाम्बुले राई मातृभाषा एवं विकास अभियानका एक अभियन्ता हुन् ।’ कृतिको भूमिकामा राष्ट्रगानका रचयिता व्याकुल माइलाले भनेका छन्, ‘हाम्रो गाउँदेखि क्षितिजपारि छ, उनको गाउँ दाम्ली । अहिले भने उनी डायस्पोरा कवि हुन् । दक्षिण कोरियाको सिओल आसपास बसेर खोटाङको डिकुवा, दाम्ली सम्झिरहेछन्, कविताका सुन्दर भाव र विचारले । सधैं विचारको आगोसँग खेल्न रुचाउने कवि हुन् ।’
