लिभु संवाददाता
ललितपुर– बेलायत सरकारले ब्रिटिस गुर्खा पल्टनमा सन् २०२१ देखि ‘थ्री आरजीआर’ थप्ने नीति लिएपछि क्रमशः नेपालबाट भर्ती संख्या बढाएको छ । हाल ब्रिटिस गोर्खामा फस्ट रोयल गुर्खा रेजिमेन्ट (वानआरजीआर) र सेकेन्ड रोयल गुर्खा रेजिमेन्ट (टुआरजीआर) मात्र रहेका छन् । कडा मिहिनेतसहित दक्षता हासिल गर्न चाहने युवाहरू संख्या बढ्दो छ । तिनै युवालाई लक्षित गर्दै यत्तिखेर तालिम दिने संस्था थपिएको छ । ब्रिटिस आर्मी, सिंगापुर पुलिस फोर्स, नेपाल आर्मी र इण्डियन आर्मी बन्न चाहने युवाहरुलाई तालिम दिने उद्देश्यले डायनामिक गुर्खा ट्रेनिङ एकेडेमी संस्था निर्माण भएको हो ।
यो संस्थाले ललितपुरको महालक्ष्मी नगरपालिका वडा नं.१ इमाडोल नयाँ बस्ती वाम्रास भवनमा तालिम सुरु गरेको छ । सन् २०२०÷२१ सेसनलाई लक्षित गरी तालिम सुरु गरेको हो ।
संस्थाका संस्थापकहरुमा सिंगापुर पुलिस फोर्सबाट अवकाश प्राप्त इन्स्पेक्टर–२ भुवनसिंह राई, चिफ इनस्पेक्टर टीकाराम सुनुवार, एसएसआई अम्बरबहादुर राई, एसआई मोतीलाल राई, एसआई अर्जुनबहादुर राई, एसएसआई जेशन राई हुनुहुन्छ । त्यसैगरी प्रशिक्षण अनुभवप्राप्त युवा सञ्जय राईलगायत रहनु भएको छ ।
‘हाम्रो लक्ष्य भनेको ब्रिटिस आर्मी र सिंगापुर पुलिस फोर्समा भर्ती लाग्न चाहने युवालाई तालिम दिनु हो,’ एकेडेमीका अध्यक्ष भुवनसिंह राई भन्नुहुन्छ, ‘यसो गर्दा हाम्रो अनुभव नयाँ पुस्तालाई हस्तान्तरण हुन्छ नै । त्यो भन्दा पनि यहींका युवालाई समयानुकुलको तालिम लिन पाउँछन् ।’ प्रशिक्षणमा अवकाशप्राप्त अफिसर्सहरु, स्वदेशमै प्रशिक्षण अनुभवी प्रशिक्षक तथा अंग्रेजी, गणित विषयका शिक्षकको व्यवस्था गरिएको अध्यक्ष राईले जनाउनु भएको छ ।
दैनिक रुपमा बिहान र बेलुका दुई सत्र शैक्षिक कक्षा लिइन्छ । त्यसैअनुसार शारीरिक व्यायाम र प्रशिक्षण संचालन गरिएको छ । ‘प्रशिक्षण सुरु भइसकेको छ,’ फिजिकल प्रशिक्षक सञ्जय राईले भन्नुभयो, ‘अहिले विभिन्न जिल्लाबाट १२ जना युवा सहभागी रहेका छन् ।’
यहाँ ब्रिटिस र सिंगापुर पुलिस फोर्सको रिक्वाएरमेन्ट पूरा गरेका युवालाई आवश्यक योग्यताअनुसारको तालिम दिइन्छ । उनीहरुलाई ब्रिटिस र सिंगापुर पुलिस फोर्सबाट न्युनतम २५ देखि २७ वर्षसम्म कार्य अनुभव प्राप्त प्रशिक्षकहरुले तालिम दिलाउने छन् ।
‘सैनिक र प्रहरीमा आवश्यक सबै किसिमका प्राविधिक तालिममात्र होइन, अनुशासनसमेत सिकाइन्छ,’ अध्यक्ष राई भन्नुहुन्छ, ‘ब्रिटिस र सिंगापुर पुलिस फोर्सलाई आवश्यक शिक्षाको तालिम दिइन्छ । शारीरिक, मानसिक, अन्तर्वार्ताको प्रशिक्षण गराइन्छ ।’ ब्रिटिस आर्मी र सिंगापुर पुलिस फोर्स केन्द्रित तालिम लिंदा अहिले नेपाली युवाले अवसर लिदैआएका नेपाल आर्मी, इण्डियन आर्मी, फ्रान्स आर्मी, दुबाई पुलिस, बहराइन रोयल गार्डलगायत देशमा समेत काम लाग्न सक्ने उहाँ बताउनु हुन्छ ।
सन् १८१५ देखि नेपाली युवाले ब्रिटिस गोर्खा आर्मीमा भर्ती हुन थालेको इतिहास रहेको छ । नेपाली युवा भर्ती हुने क्रम जारी छ । गत वर्ष चार सयजना ब्रिटिस आर्मीमा भर्ती भएका थिए भने यो पटक ४ सय ३२ जना युवा भर्ती भएर बेलायत पुगिसकेका छन् । त्यसैगरी सिंगापुरमा १ सय ४० जना भर्ती भएका छन् ।
