लिभु संवाददाता
ओखलढुंगा– रिनुवाल युवा समूहद्वारा कात्तिक १६ गते देखि २२ गतेसम्म रिनुवालको ब्ओकुला खेलकुद मैदानमा आयोजित प्रथम रिनुवाल कपको उपाधि नयाँ नेपाल सरोकार समाज, सोक्मटारले जितेको छ ।
मानेभन्ज्याङ गाउँपालिका वडा नं.३ वामद्याललाई खेलकुद पर्यटनको प्रवद्र्धन, प्रथम रिनुवाल कपको अभियान नाराबाट संचालित उक्त फुटबल प्रतियोगितामा महिला र पुरुष दुवै समूहले सहभागिता जनाउन सक्ने गरी आयोजना गरिएको थियो । सो प्रतियोगितामा पुरुषतर्फ २६ समूह र महिलातर्फ ६ समूहको सहभागिता रहेको थियो ।
पुरुष तर्फको विजेतालाई ५० हजार रुपैयाँ नगद पुरस्कार, मेडल, ट्रफी र उपविजेतालाई २५ हजार रुपैयाँ नगद पुरस्कार, मेडल र ट्रफी रहेको थियो । महिलातर्फ विजेतालाई १५ हजारल रुपैयाँ नगद पुरस्कार, मेडल, ट्रफी र उपविजेतालाई ७ हजार ५ सय रुपैयाँ नगद पुरस्कार, मेडल रहेको थियो ।
यस प्रतियोगितामा पुरुष तर्फ मानेभञ्ज्याङ युवा क्लब उपविजेता भएको छ । महिलातर्फ विजेता उदयपुरको सुनकोसी यूवा समूह घुर्मी र नव प्रगतिशील युवा समूह, खर्क, खोटाङ उपविजेता बन्यो । यस प्रतियोगितामा स्थानीय क्लबको तर्फबाट सुनसरी, काठमाडौं, उदयपुर लगायत विभिन्न जिल्लाका खेलाडीले भाग लिएका थिए ।
वामद्याल रिनुवालस्थित ब्ओकुला खेलकुद मैदान निर्माणाधिन अवस्थामा रहेको छ । उक्त मैदान लम्बाइ १०० मिटर र चौडाइ ५० मिटर रहने गरी सम्पन्न गर्ने योजना सहित काम भैरहेको छ । मैदानको विकास तथा विस्तार गर्नको लागि स्थानीय युवाहरूले अभियान संचालन गरी देश–विदेशबाट सहयोग रकम संकलन गरिरहेका छन् । यो कार्यमा स्थानीय सरकारले समेत सहयोग गर्दैआएको छ । मानेभञ्ज्याङ गाउँपालिकाले यस आर्थिक वर्षको आफ्नो नीति तथा कार्यक्रममा समेत ब्ओकुलालाई प्रदेश स्तरीय खेलकुद मैदानको रूपमा विकास गर्ने प्रस्ताव गरेको छ ।
